«ҚазМұнайГаз – Аэро» ЖШС мен қырғыз компаниясы – авиациялық отын операторы «Asman Oil Company» жауапкершілігі шектеулі серіктестігі өзара тиімді салаларда ынтымақтастық орнату туралы келісімге қол қойды. Келісім аясында екі тарап авиациялық отынмен қамтамасыз ету саласында тәжірибе алмасады.
Сонымен қатар, «ҚазМұнайГаз – Аэро» ЖШС әуе компанияларына Бішкектің «Манас» халықаралық әуежайы, Ош қаласындағы, Ош әуежайы, Тамчы ауылындағы, Ыстықкөл әуежайларында ұшақтарға «қанатқа» жанармай құю мүмкіндігі туралы қуана хабарлайды.
Іңкәр Базарбаева, кәсіпкерлікті дамыту бөлімінің бас менеджері:
«ҚазМұнайГаз – Аэро» ЖШС шетелдік серіктестермен авиациялық отынмен қамтамасыз ету саласындағы ынтымақтастықты дамытуды жалғастыруда, сондай-ақ серіктестеріміз бен тұтынушыларымызға көбірек пайда әкелуге көмектесетін халықаралық тәжірибе мен авиациялық отынмен қамтамасыз етудің озық технологияларын енгізу мүмкіндіктерін зерделеуде».
Негізгі ақпарат:
«Асман Ойл Компани» ЖШС«Манас халықаралық әуежайы» АҚ еншілес ұйымы. «Асман Ойл Компани» ЖШС негізгі қызметі – авиациялық жанармай мен әуе кемелеріне жанармай құюға арналған арнайы сұйықтықтарды қабылдауды, сақтауды және жеткізуге дайындауды қамтамасыз ету, сондай-ақ бүкіл технологиялық тізбекте кондициялауды қамтамасыз ету.
2003 жылдан бастап Қырғыз Республикасының барлық әуежайларына халықаралық және ішкі рейстерді орындайтын отандық және шетелдік авиакомпаниялардың қажеттіліктерін қанағаттандырады. Кәсіпорынның балансында жанар-жағармай материалдарын сақтауға арналған қоймалар, қажетті технологиялық жабдықтар кешені, көлік құралдары, зертхана, сондай-ақ әуе тасымалына үздіксіз авиациялық жанармаймен қамтамасыз ету үшін мұнай өнімдерін тасымалдауға арналған мамандандырылған жанар-жағармай цистерналары мен автоцистерналардың 27 бірлігі бар.
