Ташкентте Орталық Азияның жүк авиациясы саммиті өтіп, оған авиакомпаниялар, әуежайлар, логистикалық және қаржылық ұйымдар, сондай-ақ әуе тасымалдау саласындағы мамандардан 300-ден астам қатысушы жиналды. Қазақстанның транзиттік әлеуетін дамыту және «ҚазМұнайГаз-Аэро» ЖШС қызметін кеңейту мақсатында, компания өкілдері Форумға қатысты.
Саммит аясында Air Baltic, Baltic Cargo, Saudia Cargo, Centrum Air, Air Samarkand, Fits Cargo, Tashkent Air және My Way секілді негізгі серіктестермен маңызды келіссөздер жүргізілді. Келіссөздер барысында Қазақстан әуежайларын 2025 жылғы ұшу бағдарламасына енгізу және әуежайларда жанармай құю жүйесін дамыту мәселелері талқыланды.
«ҚазМұнайГаз-Аэро» ЖШС-нің саммитке қатысуы компанияның халықаралық нарықта белсенді жұмыс істейтінін және Қазақстанның Орталық Азиядағы логистикалық хаб ретінде маңыздылығын арттыруға бағытталған стратегиялық мақсатын көрсетеді.
Сонымен қатар, Өзбекстандағы жетекші мұнай-газ компаниясы Saneg компаниясының шақыруымен, «ҚазМұнайГаз-Аэро» ЖШС өкілдері Ташкент әуежайындағы жанармай құю кешенінің жұмысымен танысты.
Қазақстан әуежайларындағы жанармай инфрақұрылымын дамыту бойынша жүзеге асып жатқан инвестициялық жобалар аясында екі тарап ынтымақтастық, жобалау және жанармай құю кешендерін пайдалану мәселелерін талқылады. Сондай-ақ, Saneg өкілдері Jet A-1 маркалы авиаотынына көшу тәжірибесімен бөлісті.
