#Еңбек адамы
«ҚазМұнайГаз – Аэро» ЖШС-нің авиаотын операторы ретіндегі қызметін жүзеге асыру барысында қойма меңгерушісі–өкілі негізгі қызметкерлердің бірі болып табылады. Мұндай мамандар қауіпті инфрақұрылым нысандарында жұмыс істеуге рұқсат алу үшін арнайы оқытудан өтеді, сондай-ақ мұнай өнімдерімен жұмыс істеу кезінде қолданылатын стандарттар, ережелер мен есептеу әдістемелерін меңгереді.
— Біз кез келген ауа райы жағдайында авиациялық инфрақұрылымның тұрақты жұмысын қамтамасыз етеміз, еңбек қауіпсіздігі талаптарын қатаң сақтаймыз. Мен мұнай өнімдерін қабылдау мен сапасын бақылауға жауаптымын: көлемін, тығыздығын, температурасын тексеремін, құжаттарды рәсімдеп, актілерді растаймын. Үлгілерді іріктеу және оларды аккредиттелген зертханаларға жіберу жұмыстарына қатысамын. Сондай-ақ жанармайдың құйылуы мен жөнелтілуін, оның ішінде Қазақстан Республикасының Қарулы күштері мен арнайы органдарына жеткізілуін бақылап отырамын, — дейді Атабек Бахадырұлы.
Ол техникалық мамандықтардың маңыздылығын ерекше атап өтіп, жастарды инженерлік және өндірістік салаларды меңгеруге шақырады.
