Авиасаладағы 200-ден астам өкілді біріктірген MRO Central Asia: Kazakhstan конференциясында «ҚазМұнайГаз-Аэро» ЖШС-нің Қазақстандағы тұрақты авиациялық отын (SAF) жобасын ілгерілетуге арналған баяндамасы басты оқиғалардың бірі болды. Компания өкілдері жобаның техникалық-экономикалық негіздемесін дайындау толық аяқталғанын хабарлады. Сондай-ақ Қазақстан Республикасының Премьер-Министрі мен АҚШ-тың LanzaJet компаниясы басшылығы арасындағы ресми кездесу қорытындысы бойынша Энергетика министрлігі тарапынан үйлестірілетін, салалық министрліктер өкілдері кіретін ведомствоаралық жұмыс тобы құрылды. Қазіргі уақытта жобаны практикалық іске асыру кезеңіне өткізу үшін барлық қажетті мәселелер келісілуде.
Конференция әуе компанияларын, өндірушілерді, MRO-провайдерлерді және жеткізушілерді біріктіріп, тәжірибе алмасуға және жаңа серіктестіктер қалыптастыруға арналған тиімді алаңға айналды. Қатысушылар нәтижелі кездесулер өткізіп, салалық көрмеге қатысты және ынтымақтастықтың болашағы бар бағыттары айқындалған матчмейкинг-сессиясымен іс-шараны аяқтады.
