«ҚазМұнайГаз» ҰК АҚ-да «Жұмысшы мамандықтар жылының» салтанатты жабылу рәсімі өтті. Іс-шара жұмысшы мамандықтарының беделін арттыру және компанияның кадрлық әлеуетін дамыту бағытында атқарылған жұмыстардың қорытындысын шығаруға арналды.
Салтанатты рәсім аясында ҚМГ-нің еншілес және тәуелді ұйымдарынан өндірістік қызметке елеулі үлес қосқан және жоғары кәсібилік танытқан 58 үздік қызметкер марапатталды.
Сондай-ақ Ақтөбе қаласы әуежайындағы «ҚазМұнайГаз – Аэро» ЖШС-нің авиациялық жанар-жағармай технигі Әмірбек Мұхамбетов ерекше атап өтілді. Оның марапатталуы өндірістік үдерістердің тұрақты әрі қауіпсіз жұмысын қамтамасыз етудегі жұмысшы мамандықтары өкілдерінің маңызды рөлін мойындаудың айқын көрінісі болды.
«Жұмысшы мамандықтар жылының» қорытындысын шығару ҚМГ-нің адами капиталды дамыту, қызметкерлердің біліктілігін арттыру және компанияның еншілес әрі тәуелді ұйымдарындағы еңбек жағдайларын жақсарту бағытына берік екенін растады.
