Көктемгі кезеңде қауіпсіздік күшейтілді: «ҚазМұнайГаз-Аэро» жарақаттанудың алдын алу науқаны басталды
Ағымдағы жылдың наурыз айында «ҚазМұнайГаз-Аэро» ЖШС-де көктемгі кезеңде жарақаттанудың алдын алуға бағытталған «Жарақатсыз маусым» корпоративтік науқаны басталды.
Көктем мезгілі дәстүрлі түрде қауіпсіздік талаптары мен еңбекті қорғауды қамтамасыз ету тұрғысынан ең осал әрі күрделі кезеңдердің бірі болып саналады. Бұл уақытта температураның ауытқуы, көктайғақ, су тасқыны және басқа да табиғи әрі өндірістік факторларға байланысты оқыс оқиғалардың туындау ықтималдығы артады.
Науқан бағдарламасы персоналды, өндірістік нысандарды және арнайы техниканы көктемгі-жазғы кезеңге дайындауға бағытталған кешенді іс-шараларды қамтиды. Атап айтқанда, еңбекті қорғау талаптарының сақталуына өндірістік бақылау күшейтілді, қызметкерлерге қайта нұсқама беру және оқыту жүргізілуде, сондай-ақ авиациялық отын құю автокөліктеріне техникалық қызмет көрсету қамтамасыз етілуде.
Еңбек қауіпсіздігін қамтамасыз ету және қызметкерлердің денсаулығын сақтау «ҚазМұнайГаз-Аэро» ЖШС қызметінің негізгі басымдықтарының бірі болып қала береді. Компания қауіпсіздік мәдениетін қалыптастыру және өндірістік жарақаттануды төмендету бойынша шараларды жүйелі түрде жүзеге асырып келеді.
