«ҚазМұнайГаз-Аэро» ЖШС Түркістан облысында мұнай өнімдерін сақтауға арналған заманауи базаны салады. Инвестиция көлемі – шамамен 7 млрд теңге.
Жаңа нысан өңірдің отын инфрақұрылымының негізгі құрылымы болмақ. Мұнай базасы көлемі 19 мың текше метр болатын резервуарлар паркін қамтиды. Оның 12 мың текше метрі авиациялық отынды (ТС-1, РТ, Jet A-1), сондай-ақ жанармай мен дизель отынын сақтауға арналған. Сондай-ақ, жобаға диспетчерлік орталық, зертхана, құбырлар мен сүзгі жүйесі, теміржол құю-түсіру эстакадасы және автокөлік эстакадасы кіреді.
Мұнай базасы әуежайды авиаотынмен тұрақты қамтамасыз етуге, өңірдің энергетикалық тұрақтылығын арттыруға және авиациялық әрі логистикалық инфрақұрылымның дамуын күшейтуге мүмкіндік береді.
Жоба жолаушылар және жүк тасымалы ағынының артуына қосымша серпін беріп, Түркістан облысының маңызды көлік торабы ретіндегі позициясын нығайтпақ. Сонымен қатар, 50-ге жуық жаңа жұмыс орнын құру жоспарланған.
Жобаны іске асыру Мемлекет басшысының инфрақұрылымды жаңғырту, көлік логистикасын дамыту және өңірлердің инвестициялық тартымдылығын арттыру жөніндегі тапсырмасы аясында жүргізіліп жатыр.
