Бүгін Астана қаласында «ҚазМұнайГаз» ҰК АҚ еншілес және тәуелді ұйымдары қызметкерлерінің қатысуымен басталған Спартакиаданың іріктеу кезеңі салтанатты түрде ашылды.
Жарысқа 10 кәсіпорын, соның ішінде «ҚазМұнайГаз» ҰК АҚ, «ҚМГ Қашаған Б. В.» «ҚМГ-Инжиниринг», «KMG–Security», «ҚазМұнайГаз-Аэро», «ҚМГ-Құмкөл», «KMG Drilling&Services», «KMG Barlau», «ҚМГ Қарашығанақ» және «Kazakhstan Energy Reinsurance Company» ұйымдарынан 300-ден астам қызметкер қатысады.
Іріктеу кезеңі футзал, волейбол, баскетбол, арқан тарту, киберспорт, тоғызқұмалақ, армрестлинг, шахмат, асық ату, бес асық, садақ ату, үстел теннисі және жүзуді қоса алғанда, спорттың 15 түрінен өтеді.
Биылғы Спартакиада бағдарламасы эстафеталар мен жеке жарыстар форматында өтетін жеңіл атлетикамен толықтырылды. Ойындар қорытындысы бойынша жеңімпаздар ҚМГ Спартакиадасының финалдық кезеңіне жолдама алады.
Жалпы, ҚМГ салауатты өмір салтын, спортпен шұғылдануды насихаттауға және корпоративтік рухты нығайтуға ерекше көңіл бөлуде. Компания жыл сайын спорттық іс-шараларды, соның ішінде қайырымдылық марафондарын өткізіп келеді.
