2025 жылғы 23 шілдеде елімізде «Жер-2025» республикалық командалық-штабтық оқу-жаттығуы басталды. Республикалық штаб Шымкент қаласында орналасқан. Оқу-жаттығу Қазақстан Республикасы Төтенше жағдайлар вице-министрінің жетекшілігімен өткізілуде.
Азаматтық қорғаудың мемлекеттік жүйесінің басқару органдары мен күштері, сондай-ақ ТЖМ бөлімшелері жоғары дайындық деңгейіне келтірілді. Сонымен қатар республикалық және қалалық жедел штабтар және зардап шеккен халықты уақытша орналастыруға арналған шатырлы қалашықтар құрылды.
Оқу-жаттығу барысында екі күн ішінде қатысушылар төтенше жағдайлар кезінде жедел және шұғыл қызметтер арасындағы өзара іс-қимыл мен үйлестірудің практикалық дағдыларын пысықтайды.
Оқу-жаттығудың практикалық кезеңі сейсмикалық қауіпті аймақтарда — Алматы, Шымкент қалаларында, Абай, Жетісу, Алматы, Шығыс Қазақстан, Жамбыл, Қызылорда және Түркістан облыстарында өтеді. Бұл өңірлер жойқын жер сілкінісі қаупі бар аймақтар болып табылады. Қалған өңірлерден апат аймақтарына күштер мен құралдарды жөнелту ұйымдастырылады.
Оқу-жаттығу аясында Қазақстан Республикасы Энергетика министрлігінің азаматтық қорғау жанар-жағармай материалдары қызметінің құрамында «ҚазМұнайГаз-Аэро» ЖШС қызметкерлері белсенді түрде қатысуда. Компания мамандары шартты жер сілкінісінен зардап шеккен аймақтарға авиациялық отын, майлау материалдары және басқа да ЖЖМ түрлерін жеткізуді қамтамасыз етуге тартылған.
Шынайы жағдайларға барынша жақын ортада жанар-жағармай материалдарын жеткізу алгоритмдері, жанармай құю пункттерін ұйымдастыру, авиациялық және жерүсті бөлімшелерімен өзара іс-қимыл, сондай-ақ қиын қолжетімді аймақтарға логистиканы ұйымдастыру мәселелері пысықталуда.
«Жер-2025» оқу-жаттығуы жер сілкінісі кезінде әрекет етуге дайындықты арттыру мен әрекет ету жүйесін жетілдіруге бағытталған.
